Saturday, October 01, 2022
गुड न्यूज बायबल !
गुड न्यूज बायबल् !
आज हा बाबा चक्क किरिस्तांव् झाला की काय अशी तुम्हाला शंका येईल कदाचित्. पण लंडन मधील प्रत्येक दवाखान्यात (सर्जरीत) वरील शीर्षक असलेले पुस्तक हमखास डेस्कवर दिसेल. कदाचित तिथे सांगितले जाणारे उपचार थोडे श्रध्दापूर्वक अंगिकारले तर बरे, असा प्रांजळ विचार या मागे असणे शक्य आहे ! तसे नसले तरी मी केवळ वेळ घालवण्यासाठी ते पुस्तक चाळले होते. खरंतर ख्रिश्चन धर्माबद्दल मला खूपसे आकर्षण नसले तरी कुतूहल निश्चित आहे. तसे मी मराठीतले ‘कुरआन्’ देखील नजरेखालून घातलेले स्मरतें. ते गुड न्यूज बायबल चाळताना साहाजिकच अनेक वर्षांपूर्वी पाहिलेला ‘टेन कमांडमेंट्स’ हा चित्रपट आणि त्यांत मोझेसच्या आज्ञा थोड्याफार आठवल्या. असेच ‘न्यू टेस्टामेंट’ देखील वाचलंय मी थोडे थोडे.
हे सर्व सांगण्याचे कारण इतकेच की ‘गुड न्यूज’ किती प्रकारची नि कशी असू शकते याचा लेखाजोखा घेणे ! निराश केले का मी ? तरी पण ऐकाच माझे.
एखादी नव-परिणित वधू केव्हा एकदाची गुड न्यूज देते इकडे बहुतांश नातेवाईकांची जिज्ञासा असते ना, अगदी तसेच (आमच्या काळीं ) ‘केव्हा एकदा हा गधडा म्याट्रिकचा किल्ला सर करतोय्’ अशी खंतवजा हुरहूर असे. मात्र एकदा का थर्डक्लास का असेना, गंगेत घोडे न्हाल्याची गुड न्यूज गावभर पसरवण्यांत धन्यता मानत काही आईबाप !
मुलगा झाला की गुड न्यूज नि मुलगी निफजली तर ‘बेटर लक् नेक्स्ट टाईम’ अशी स्वत:चे सांत्वन करून घेणारे सासू सासरे काही कमी नसत - त्या काळीं - कारण आता बेटा हो या बेटी, ऑल इज ‘गुड न्यूज एनी वे ‘ अशीच प्रतिक्रिया ऐकता येते हल्लीं.
ते असो, रात्रभर खोक खोक खोकणाऱ्या म्हाताऱ्याचा ठसका आटोक्यांत आला किंवा रिपरिप पडणाऱ्या पावसा सारखी सतत बडबड करणाऱ्या म्हातारीला अंम्मळ डोळा लागणे ही जशी गुड न्यूज असेल तसेच फारा दिवसांचे बध्दकोष्ट (constipation) एखाद्या अद्भुत चूर्णाने दूर झाले तर त्याच्या इतकी ‘गुड न्यूज’ असूच शकत नाही (असे स्वानुभवाने ठामपणे सांगू शकतो आज ! )
खूप खूप ‘सडे’ मारलेत ना आज ? पण नेहमीच गंभीर विषय काय म्हणून हाताळावे कुणीही ? ?
रहाळकर
१ ऑक्टोबर २०२२
